講到青島啤你會聯想到啲咩畫面？會係一大班麻甩佬坐喺大排檔，食住野飲住酒大聲傾計？定係茶餐廳入面，一條友食住火腩飯，享受依份「男人的浪漫」？
雖然價錢咁親民都唔會係乜野高檔啤酒，但你又有冇諗過深入啲了解下佢地個牌子呢？今次我就帶大家去下佢既發源地青島，睇睇依個地方有乜好玩！
歷史簡介
青島啤酒始建於1903年，最初只係英、德商人為左供應居住當地既西方人而成立，雖然業權幾經轉變，但一直以黎都用最傳統既德式手法去生產啤酒。經過百幾年既發展，佢已經係全中國最大既啤酒品牌，長期佔全國啤酒總出口量一半以上；亦係歐美市場入面，其中一個最受認可及歡迎既亞洲啤酒。
上世紀九十年代，青島採取左「做大做強」既策略，喺各地不斷併購其他啤酒廠，現時全國廿幾個省份入面，青島啤更加擁有接近六十個廠房！雖然生產既重任已經唔止落喺原廠身上，但作為起源地的青島啤酒廠，地位亦都不減當年，甚至成為當地特色景點，帶動左旅遊業既發展！
周圍都係青島啤
黎到青島旅行，你會發覺好似行到邊度都會有啤酒賣！唔同喺香港你淨係會見到黑啤白啤同青島純生，依度既超市同便利店入面，你隨隨便便都可能見到十款以上既青島啤酒，麥芽濃度、酒精含量以及產地既分別都會標埋出黎。
當地幾乎喺每一間餐廳，你都可以輕易地叫到一扎青島生啤，講究少少既你甚至可以同一個地方搵到幾種唔同等級既原漿啤酒，似乎真係你每餐飲啤酒，都未必試得曬當地限定既款式……
更誇張既係，有時行行下街，你都會見到有啲路邊檔擺左一大個不鏽鋼桶既啤酒，斷斤賣，可以比你用膠袋成袋拎走，一路行一路飲！可惜我見到果時冇買，而之後兩日行程一係飲得太多，一係就遇唔到依啲鋪。
漫步青島啤酒街
除左舊既青島啤酒廠變成依家既青島啤酒博物館，廠址前面既登洲路亦都改建為帶有歐洲特色既青島啤酒街。
由延安二路到廣繞路依度近1公里既長街，有超過60間唔同既食肆，大部分都係提供青島當地出名既海鮮，另外部分外國菜既餐廳以及酒吧，等大家參觀啤酒廠之前亦可以順便醫下肚。
唔止街道兩邊既建築物感覺唔似係中國、馬路亦變成青島啤酒標語性既綠色、甚至連路邊既垃圾筒同長櫈都係啤酒桶／啤酒樽既造型！
每年八月更加有為期16日既青島國際啤酒節，到期時成條啤酒街會化身一個大型嘉年華，各種各樣既文化節目、攤位同埋表演充斥住成條街，發展左廿幾年已經成為當地既一大盛事。
百年青島啤酒廠
講左咁耐終於去到我地既目的地，青島啤酒廠！比起啤酒街刻意營造既復古感覺，依度擁有既歷史就明顯多出好多。
雖然人民幣60元既入場票價幾乎係冠絕當地景點，但的確係非常值得參觀既一個地方。(門票包括2杯啤酒及1包啤酒花生)。
首先會係一啲歷史性既展品，例如廣告、舊酒標、新聞、註冊文件等等。
之後會去到生產既部分，其實同威士忌有少少相似，例如發麥、糖化，發酵等等，雖然參觀路線見到既設施都唔係運作緊，但亦都可以比大家具體啲了解下啤酒既生產。(值得一提係依度既假人幾可亂真，冇留意真係會比佢嚇親...)
可以拎上手玩、甚至係試食既麥芽、啤酒花等等原料，麥芽會似平時粟米片果啲穀類製品、而啤酒花就比較苦。
去到中段會有得試未經過濾既原漿啤酒，味道比平時飲到既濃郁太多，當然酒精含量亦超過10%，如果午餐已經飲左酒既朋友要小心醉！
反而裝瓶依部分你可以真係睇到運作緊既工廠。
玩視覺錯亂既醉酒小屋，幾有趣。
行到最尾有一個比較大既會場，大家可以係度換埋門票包既另一杯啤酒，坐底慢慢嘆；而旁邊既紀念品店除左大量印有青島logo既周邊產品，仲有幾款得博物館先有得賣既特別啤酒，以及同啤酒相關既食品飲品，大家都可以買啲手信比鍾意飲酒既朋友。
當然仲有個特別少少既服務，係印一支酒標有自己樣既「肖像啤酒」……但我相信大部分人都對依個冇興趣……
依篇就講住咁多先，下星期帶大家睇睇青島酒以外既景點！
Article 015 原載於主場新聞 2014.5.20
沒有留言:
張貼留言