終於嚟到一連三星期青島遊記嘅尾聲啦，雖然講完酒廠講完風景，但作為山東首屈一指嘅旅遊城市，又點止咁少野睇呢，今次繼續帶大家周圍去睇下！
青島的海
臨近膠洲灣嘅青島，其實有唔少景點都係位於海邊，甚至零八年嘅北京奧運會當中，青島亦係水上運動嘅協辦城市之一，更加令沿海地區喺依幾年有一個好大嘅轉變。
講到同奧運有關首先要講下奧帆中心附近，由於當時風帆比賽就喺依度舉行，沿海一帶亦發展出唔少針對遊客嘅景點。
其中一個係五四廣場一帶嘅海濱公園，有唔少雕塑、噴泉同埋開揚嘅海景，一個好適合散步嘅地點，甚至天氣好嘅時候你亦都會發現唔少人喺度放風箏。
沿海地區亦有一排賣手信嘅店鋪，好多貝殼、乾貨有關嘅手信可以喺依度買到。當然我唔建議大家為買而買，講真依類「當地特色」嘅手信買完可能自己都後悔……
當年嘅比賽場地附近亦都起左唔少購物中心以及同水上活動有關嘅設施，但始終海同夏天都係最配搭，可能我黎得唔岩時間，所以當時好多都仲未有得玩。
理想與現實真係相差非常大嘅奧運火炬，好可惜我去果時只有光禿禿嘅旗桿……附近嘅情人壩酒吧街亦都比較冷清。
除左上面提到新發展嘅地方，其實唔少原有景點好似八大關同埋棧橋都係位於海灘附近，每到夏天亦都有非常多遊客嚟到戲水。
每日都係人山人海嘅棧橋。
八大關花石樓對出嘅石灘亦係青島嘅婚攝熱點。
除咗游水之外，你亦都可以考慮水上單車、水上電單車等等嘅活動，甚至去到某啲地區你仲可以玩潛水，算係其中一樣同其他內陸城市唔同嘅地方。
除咗以上提到嘅幾個地方，不得不提當然仲有號稱「海上第一仙山」嘅嶗山。除左大量同佛道兩教有關嘅寺廟、亦都有好多少見嘅地質風景，係當地熱門嘅風景區之一，雖然有部分評論覺得依度嘅景點已經發展得太過公式化，但我因為時間關係就冇去到，所以就唔作太多評價。
食在青島
去旅行當然唔可以忽略飲食，除左第一篇我同大家提到幾乎每餐都可以試到唔同款嘅啤酒之外，食方面其實亦有唔少特別得稱讚嘅地方。
靠山吃山、靠水吃水，作為一個沿海城市，青島嘅海產真係平到你唔信！幾乎每一間中式餐廳都係以海鮮作為主打，如果對依啲野食敏感嘅朋友我真係唔知你點算。
好似上圖嘅扇貝同炒蜆都係廿幾蚊港紙，平得非常誇張！
https://www.youtube.com/watch?v=V4J9N9K00Rk
其中一個你平時唔會見到嘅生物：海腸。雖然切粒煮完好似冇乜特別，但佢活生生嘅樣子真係十分令人吃驚……(以上影片搜自youtube，並非本人拍攝)
北方嘅飲食文化同香港好唔同，比起我地幾乎一定要有飯，依度會更多係包、麵或者餃之樣做主食。
而另一個方別就係好似好多菜式都偏濃味，尤其山東菜喺調味方面就更加重手。
返大陸食辣亦都比平時我哋食到嘅過癮好多！其中一晚喺間連鎖食店食到嘅夫妻肺片。
發展多年嘅特色小食街劈柴院亦係大部分遊客熱點之一，雖然非常出名，但我個人就覺得佢名過其實，環境幾特別，但野食真係不敢恭維……
在戶外長期擺放的食物，我試左個蟹同海膽蒸蛋，兩樣都好腥。
似乎上面果籠其中一款點心係扮緊喜羊羊……
昆蟲盛宴
反而有時街邊見到嘅小食更為吸引，好似通向棧橋地下隧道一帶嘅小食攤。
街邊嘅串燒檔，依棵由鐵籤組成嘅樹真係令人嘆為觀止。
後記
雖然我只係住左三晚，但今次住嘅酒店 - 青島老轉村公社文化藝術酒店我個人極之推薦！
雖然唔算好豪華，但古典風格嘅佈置令人感覺好舒服，酒店入面甚至仲有唔少藝術品嘅展覽，而每日嘅晚飯時間餐廳更加有文化表演，房內仲每日提供水果以及之後一日嘅天氣提示
如果日後大家會去青島的話，不妨考慮下依個位於浮山所文化街嘅酒店！
Article 017 原載於主場新聞 2014.7.11
沒有留言:
張貼留言