上星期我地介紹左青島市入面同啤酒有關既部分景點，但去一次旅行總冇可能將全部時間放喺酒依方面，今次就帶大家睇下青島啤酒廠以外既青島市！
位於山東膠州灣海邊既青島，喺清朝後期曾經係德國租界，而第一次世界大戰以及其後既一段時間，青島亦曾經受到日本管治，種種歷史背景令青島既規劃變得同其他中國城市完全唔同，有時候甚至令你有置身外國既感覺。
四月青島 花滿中山公園
如果講到睇櫻花，唔計去長洲關帝廟依類咁另類既行程，相信大部分既人都會第一時間諗起日本，但原來青島喺日治時期都種落左唔少櫻花，所以一到四月開花既日子，賞花既人潮之多，絕對係超乎你想像。
當中規模最大應該係位於南區既中山公園，公園入面更加種左超過兩千棵櫻花，其中大部分都係日本常見、比較淺色既染井吉野櫻，唔同香港台灣多數種植另一類偏向桃紅色既品種。
每年五．一前後既二十幾日，更會有一年一度既櫻花盛會，熱鬧到可以媲美日本花季既祭典，除左可以沿住公園入面既「櫻花路」邊行邊睇，你亦可以同時喺附近搭建既小食攤位買啲野食坐低慢慢賞花。
除左櫻花之外，中山公園亦都有荷蘭引入既鬱金香，五顏六色整齊既花海相比起櫻花獨沽一味又係另一種唔同既感覺，鍾意花既朋友四月尾黎到絕對可以影返大半日相。
如果係其他月份黎，雖然冇依兩種花，但大家亦可以留意下會唔會係桂花、牡丹、菊花等等品種盛開既日子。
當然作為一個綜合性既康樂設施，中山公園仲有好多吸引人既地方，好似古色古香既亭台樓閣同水池、各種藝術雕塑同佈置、有通向山上既觀光索道，仲有適合一家大細既動物園同遊樂場（如果大家敢玩佢啲機動遊戲……）。
不過再靚都好，睇到附近人群既行事方式，你都會明白自己依然身在中國，我諗依張圖唔使解釋大家都明佢地有幾守規矩。
同場加映某一晚路邊見到既「夜櫻」。
穿梭各區 訪尋德國建築
喺過去一百多年既歷史入面，青島有幾乎一半都係比外國勢力管治，所以規劃同外貌上比其他中國城市好唔同，雖然好多舊時起既建築已經失去佢原來既作用，但係好彩大部分都仲保存到落黎，漸漸就慢慢變成左青島市獨有既景觀。
其中一個比較出名既會係「八大關」風景區，依個人口密度非常低既別墅區，由幾條用中國古代關隘命名既街道組成，圍牆入面一棟棟歐洲風格既建築、闊落既街道以及兩邊整齊排列既樹、以及佔地極多既綠化帶同公園，都比到人一種好舒服既感覺。
而八大關亦係中山公園以外另一賞櫻熱點。
位於海邊、睇落成座堡壘一樣既花石樓更加係必到既景點之一，除左可以親身入去睇下古典既西歐佈置，屋頂既平台更加可以比大家感受下超過180度既無敵海景，以及回望剛才行過既八大關！
而另一個就會係西面比較近火車站既老城區，依度唔少舊既教堂、醫院同埋其他政府建築都係德治時興建，例如天主教堂、基督教教堂、總督府、迎賓館等等都係非常熱門既景點。
除左依幾個大型建築，其實漫步老城區既途中，偶然你都會發現路邊有一棟幾靚既歐洲風格大屋。
其實遠少少仲有一條德國風情街，但附近就比較冷清少少，雖然環境唔錯，但好多睇落充滿歷史既建築都未必開放比人參觀。
因為青島咁多美輪美奐既古舊建築，亦令依度慢慢成左影婚紗既熱點，甚至有幾條婚紗街集合左大量相關行業既店舖。基本上你去到每個著名景點前面，都會見到幾對新人同時喺度影婚紗，有時我真係好佩服啲攝影師，竟然可以喺咁擠迫既情況之下取景……
因為仲有好多地方未講，所以下個星期我地都繼續留喺青島，睇下沿海地區、以及一部分比較有特色既景點！
Article 016 原載於主場新聞 2014.6.28
沒有留言:
張貼留言